Maxaa laga baran karaa.. Qaybtii {2}
Loolanka Agaasime James Comey iyo Madaxweyne
Donald Trump?
Loolanka siyaasadeed ee Comey iyo Madaxweyne Trump waxa si weyn
loogala socday dunida gaar ahaa waddanka Maraykanka dhexdiisa, waxa isha si
gaar ah ugu hayay dadka faaqida arimaha is xukunka dawladdnimada iyo ku
dhaqanka hanaanka hufnaanta dawladdnimo, sidoo kale waxa xiise gaar ah u yeelay
doorka saxaafada gaar ahaa jariiradaha mataanalaha ah ee Washigton post iyo New
york times, kuwaas oo daabacay xogo kaalin muhiim ka ciyaaray loolanka Comey
iyo Trump, bal haddaba aan sii waddno sheekada saamaynta ugu badan ku leh
loolankood si aynu u gaadhno qodobo qof ahaan iyo qaran ahaaanba laga qaadan
karo.
Sheekadii inoo soctay waxay inoo joogtay Trump oo saldhigi la’a
ka dib baadhista FBI-da ee Mike Flynn, La taliyihii amaanka qaranka ee Trump ee
lagu qasbay inuu xilka ka dago, Trump ka dib waxa uu Aqalka Cad kula balamay
James Comey.
Haddaba Kulankani waa mid ka mid ah kuwa ugu xasaasisan 9 kii
xidhiidh ee Comey iyo Trump dhexmay, kulanku waxa uu kaliya dhex maray Trump
iyo Comey cid kale kuma aysan wehelinin, wixii dhex maray oo saameeyay ficilo
badan oo madmadow galiyay hanaanka isla xisaabtan Waddanka Maraykan ayaa ka
dhigay in si qoto dheer loo faaqido xogta kulankan iyo sida ay labada dhan ee
kulmay (Trump iyo Comey) midba u sheego xog ka duwan ka kale, halkaas marka ay
marayso hufnaanta xogtu waa aasaaska dooda cid loo iilanayo ama la qaadnayo
warkeeda, haddaba sidee wax u dhaceen, ugu horayn kulanku waxa uu ku bilaabmay
jawi dagan oo taxdar badan uu ka muuqdo Agaasime Comey, sababta taxdarka dheer
galisay ayaa ah xafiiska uu joogo ee FBI-da iyo baadhista uu gacanta ku hayo ee
Flynn oo sababi karta inay raadayso Trump.
Sida uu sheegay Comey, markii uu horfadhiy gudida baadhista
aqalka odayaasha (Senate),waxa Madaxweyne Trump uu kulankaas waydiisatay
Agaasime Comey inuu rajo ka qabo inuu sii joogo xafiiska FBI-da iyo in kale,
waxa uu yidhi Comey waan la yaabay waxa aanan gartay in sababta cashadu laygu
yeedhay ay tahay in xilkayga FBI-da la iga waraysto in aan sii joogayo iyo in
kale, tani waxay ii muujisay in Madaxweynuhu doonoyo in uu xidhiidh dhaw ila
sameeyo, taasi waxay ii muujisay ayuu haddan comey yidhi in aan dareen xoogan
qaato iyada oo dhaqanka caanka baxay ee FBI-du ahaa in uu madax banaanado,
waxaan ku afgoobaadsaday in aanan cidna siyaasin taageero u hayan ee aan dhex u
ahay taasna ay shaqda FBI-du I farayso.
lakiin in yar ka dib ayuu Trump si cad ii waydiistay in aan
daacad dhab ah u noqdo, taas oo na galisay labadayba in aanu dariiqado kala
aamusno, waxa aan ku idhi aniga oo dabin dhawranaaya in aad daacadnimo iga heli
doontid taas oo aan uga jeeday in aan wax aad leedahay kaa qaadin wax aanad
lahayn kuugu eexan. Dhawr goor ayuu arinkaas soo celceliyay in aan daacad u
ahaado ana intaas uun baan ugu jawaabayay, habeenkaas waxa kale oo Comey
madaxweynaha u sheegay in aanu baadhis ku wadin isga lakiin mike Flynn iska la
baadhayo.
Jaho-wareerka Aqalka cad wuu sii socday, 3 cisho ka dib
habeenkaas waxa shaqada uu Trump ka erayay Sally Yates oo ku sime ka ahayd xeer
ilaaliyaha guud, waxa laga raacay warkii xidhiidhka Flyyn ee ruushka ee ay
Aqalka cad soo gaadhsiiyay oo saxaafaduna heshay, waxa kale oo ay diiday inay
difaacdo go’aanka Madaxweynu uu kaga joojiyay 7-ba dal oo u badan Muslim in ay
soo galaan Maraykanka, go’aankaas Madaxweynaha (Excutive Order) oo Sally Yates
ay ku tilmaamtay mid aan sharciga waaqasannay, waxaanaa mar danbe laashay
Maxkamadaha federaalka ah.
Arinta La taliye Flyyn waxay laf-dhuun gashay ku noqtay Aqalka
cad iyo Trump, waxay sidoo kale baadhis xoog leh bilaabay FBI-da iyo laamaha
sirdoonka Maraykan ee kale, doorka saxaafada ayaa iyana aad u sareeyay kwaas oo
helayay soo bandhigayay xogaha qarsoon ee ay ka helayeen ilo wareedyo badan oo xidhiidh
dhaw la leh aqalka cad iyo kaydadka xogaha ee kale duwan.
Saddex iyo toban cisho ka dib caydhintii Sally Yates, February
13, ayaa Jariirada Washington post ay daabacday maqaal dheer oo ay ku
faaqidayso in Flyyn uu marin habaabiyay Madaxweyne Xigeenka Maraykanka iyo
Aqalka Cad isaga oo ka been sheegay nooca kulan ee uu la qaatay Ambassador
Kislyak iyo sidoo kale xidhiidhkiisii dhanka telefoonka (phone calls) ee uu la
yeeshay safiirka ruushka, saacado ka dib daabacada maqaalka Washington post
ayaa Flynn lagu qasbay inuu xilka isga dago (resign), xil ka dagista mike Flynn
waxa dadka Maraykanka u xaqiijiyay Spicer, Xoghaya saxaafada Aqalka cad,
sababta xil ka tagista waxa lagu sheegay in Flynn uu lumiyay kalsoonida
Madaxweynaha iyo Madaxweyna xigeenka Maraykanka.
Maalin ka dib iscasilaada Mike Flynn ayaa haddan ay dib ugu
kulmeen agaasime James B. Comey iyo Madaxweyne Trump, Kulanka oo ka dhacay
xafiiska Madaxweynaha Maraykanka ee Oval Office loo yaqaano ayaa haa mid sii
qorshaysnaa kaas oo Comey isaga oo gudanay waajibkiisa qaranka uu Madaxweyne
Trump la socdsiinayay hawlaha sirdoon ee Madaxweynaha Khuseeya sida waxa ay ugu
yeedhaan ka hortaga argagixisada (Counterrorism).
Lakiin sida James Comey sheegay markii kulankaas uu la qaatay
Trump dhamaaday ayaa Madaxweynuhu ii sheegay in aan fadhiyo dadkiina ka
codsaday ina ka baxaan oo loo xidho albaabka loo yaqaano grandfather, markii la
xidhay ayuu Trump ii sheegay inuu doonayo inuu igala hadlo arinkii Mike Flynn,
waxa uu igu yidhi Madaxweynuhu in aanuu Mike Flynn wax khaldan samayn arintiisa
la xidhiidha ruushka, lakiin uu Flynn si xun u marin habaabiyay Madaxweyne
xigeenka oo uu xogtaas ka qariyay ka hore magacaabistiisa (Waxa xusid muddan in
Flynn magaacbistiisa ay ahayd ka hore intii aanuu Trump xilka loo dhaarin, taas
oo Madaxweyne xigeenku ahaa Madaxa kooxda kala guurka ee labada xukuumaddood).
Comey waxa uu sheegay in Madaxweyne Trump u sheegay in Flynn
yahay nin wanaagsan, waxa uu ku celceliyay in aanuu wax khaldan samayn
arinkiisa ruushka, aniga, Comey, waxa aan ku celiyay in Flynn yahay nin
wanaagsan aniga oo sheegay shakhsi ahaan lakiin aan waxba uga jeedin in
arinkiiisa ruushka aanu waxba samayn.
James Comey oo Guddida baadhista sharci dajiyayaasha ay su’aal
waydiisa la xidhiidha sida uu u qaatay amaantaas uu tilmaamay Madaxweynaha ee
ah in Mike Flynn yahay nin wanaagsan wax khaldan aanu samayn arinkiisa ruushka,
ayaa Comey ku jawaabay inuu u qaatay sifaynta Madaxweyna qaab “Tilmaan ah
(Directive)” lakiin Garyaaanada Trump ayaan tilmamay in aan loo qaadan Karin
Tilmaan weedhaha Madaxweynaha.
Qaska iyo jahawareerka Trump wuu sii socday, 18 cisho ka dib,
March 4 ayuu Trump Twiterkiisa oo dhigay in Madaxweyne Obama uu duubay
khadkiisa Telephone-ka wakhtigii uu doorashada ku jiray Trump, Maalin ka dib
ayaa Jariirada New York Times ay baahisay xog ku saabsan in Comey uu waaxda
Cadaalada Maraykan ka codsaday in aanay dag jalaq u siin sheegashaada aan
daliilka lahayn ee Trump ku sheegayo in la duubay telefoonadiisa.
March 20 keedii ayuu Comey sheegay in Waaxda Cadaalada
Maraykanku (Depertmet of Justice) ku war galisay in aanay helin xog ku filan oo
taageerta sheegasada Trump ee ah in la duubay Telefoonadiisa sidaasna ay ku
laabtay kiiskaas, waxa kale oo Comey sheegay in isla maalinkaas ay FBI-du baadhaysa
nooc xidhiidh ee ka dhexeeyay shakhsiyaadkii ku jiray olalihii doorashada ee
Trump iyo dawladda ruushka, waxay FBI-du baadhaysay in uu jiro nooc xidhiidh ah
ee ka dhexeeyay olalaha Trump iyo isku dayga ruushka ee farogalinta doorashada
Maraykanka.
Sidoo kale, markii James Comey uu si daah furan ugu waramay
Gudidi waxa Trump qaaday….
La soco qaybta 3aad iyo sheekada oo meel xasaasi ah gaadhay
W/Q. Abdiqani Egeh
Comments
Post a Comment