Maxaa laga baran karaa.. Qaybtii [3]
Loolanka Agaasime James Comey iyo Madaxweyne
Donald Trump? {3}
Markii James Comey uu si daah furan ugu waramay
Guddiga baadhista ee Aqalka odayaasha Maraykanka ayaa Jariirada Washtington post
ay baahisay maqaal ay ku sheegayso in Madaxweyne Trump uu laba goor oo kala
gaar ah waydiistay laba sarkaal oo khubro ku ah sirdoonka ah, Deniel Coates oo
ah agaasimaha sirdoonka qaranka Maraykanka iyo Adm. Micheal S. Rogers,
agaasimaha haaydaha amaanka qaranka maraykanka, in ay ka caawiyaan inuu iska
caabiyo baadhista FBI-da wado, waxuu Trump si cad ugu sheegay labada sarkaal
inay toos u diidaan inay jiraan waxa cadayn ah oo tilmaamaysa farogalinta
ruushku ku lahaa doorashadii 2016, lakiin waxa lagu soo waramay in
masuuliyiintaas sirdoonku ay u arkeen codsigu in aanu ahayn mid haboon oo ay
raaci karayaan.
Toban Cisho ka dib, ayuu haddana Madaxweyne Trump mar
kale James Comey telefoon kula xidhiidhay, waxa Comey sheegay in Madaxweyne
Trump uu soo wacay March 30, isaga oo kala hadlay arinta farogalinta doorashada
ee ruushka, Comey waxa uu sheegay in Madaxweyne Trump uu ku tilmamay arinta
ruushka Dhas Cloud haysta maamulkiisa taas oo wiiqaysa inuu shaqadiisa
Madaxweynimo si wacan u guto, waxa Trump ku dooday in aanay jirin wax la taaban
karo oo ruushku sameeyay ama aanay jirin waxa is dabo marin ah oo ruushku ku
sameeyay doorashadii uu ku guulaystay.
waxa kale oo Trump u sheegay Comey in uu filayo in
telefoonadiisa la duubi jiray wakhtigii olalaha doorashada, sidaas darteed
waxaan Trump ahaan kaa codsanayaa in aad Dhaskaa aad qaado Lift the Cloud.
James Comey waxuu u sheegay in uu ugu sheegay Trump
sidoo kale uu u sheegay hogaanka kongresska shakhsiyaadka la baadhayo, taasna
uu markale Madaxweynaha xasuusinayo, intaas ka dib waxa Trump codsaday in uu
xaqiiqda dagdag u soo saaro, waxa kale oo Trump sheegay malaha inay jira
satalatyo si khaldan wax u sameeyeen, lakiin aanuu isgu wax lug ah ku lahayn
arinkaas.
Laba iyo toban cisho ka dib maalintaas ayuu Comey sheegay
in mar kale uu Trump telefoon ka soo wacan, kaas oo ahaa xidhiidhkii ugu
danbeeyay ee isaga iyo Trump dhex mara, Waxa uu Trump ka codsaday wax uu ka
qabtay codsigiisii hore ee ahaa in xaqiiqada dagdag loo soo saaro, Comey waxa
uu u sheegay in uu fariin ugu dhaafay ku xigeenka xeer ilaaliyaha guud ee
Maraykanka lakiin aanu war ku soo celin, Comey ayaa fariin Trump ugu dhiibay ku
xigeenka xeer ilaaliyaha guud isaga oo sheegay in aanu mar danbe u dulqaadan
doonin in Trump telefoon kala soo hadlo oo wax shaqada ay hayaan khuseeyaa kala
hadlo, lakiin haddii Madaxweynuhu raba inuu shaqada war ka helo uu soo maro
wadadda sharciga ah oo ah Waaxda Cadaalada Maraykanka ama xafiiska xeer
ilaalinta oo FBI-du ay u mariso xogta Madaxweynaha marka laga reebo inay si gaar
ah war u siiyaan Madaxweynaha taas oo qorshe cad iyana ku timaada.
May 2-deedii ayuu Trump Twitter-kiisa ku eedayay Comey
isaga oo tilmamay in Comey uu fursado badan oo saxaafada ah siiyay Hillary
Clinton, lakiin taas Comey waxa uu kaga jawaabay in uu Koongrasska Maraykanka u
sheego in aanu siin wax fursada ah ama aanay rumaysnayn in baadhistoodii
Hillary Clinton aanay wax saamayn ah ku yeelan doorashada taasna hadda la
laabayba, lakiin ay hadda waddayaan baadhista ruushka ee farogalinta doorashada
ah.
Lix cisho ka dib, May 8, ayuu Trump u sheegay Xeer
ilaalihaya iyo ku xigeenka xeer ilaaliyaha guud, General Jeff Sessions iyo
General Rod J. Rosentein inuu rabo inuu shaqada ka caydiyo James Comey. General
Rod J. Rosentein, ku xigeenka xeer ilaaliyaha guud ayaa soo qoray soo jeedin ku
saabsan in Shaqada laga eryo James Comey, in kasta oo mar danbe cida codsigaas
samaysay shaki la galiyay, Comey waxa erigiisa sabab looga dhigay in xafiiska
FBI-du ay hoos u dhacday sumacadiisu loona baahday in qof cusub oo haga loo
xulo, dalabka warqada General Rod J. Rosentein lama sheegin cid ka codsatay
inkasta oo saxaafadu sheegtay in Trump ka dambeeyay.
Sagaalkii Bishii May, ayaa Comey loo sheegay in maanta
wixii ka danbeeya aanuu sii waddi doonin hogaanka FBI-da, warqada lagu erayay
ayaa lagu xusay in aad loogu mahad celinayo sidii uu saddex goor oo kala duwan
ugu sheegay Madaxweyne Trump in aanuu baadhis shaqsi ah ku wadin, taas oo u
muuqta in Trump uu tixraacayo kulamadii January 6, 27 iyo March 30-keedii.
Maalin ka dib caydinta Comey waxa Trump uu Aqalka Cad
kula kulmay Wasiirka Arimaha dibada iyo Safiirka Washington u fadhiya ruushka,
Madaxweyne Trump waxa uu u sheegay masuuliyiinta Ruushka in uu Comey shaqada ka
erayay sababta oo ah inuu kala kulmay culays dheeri ah arintiisa ruushka
awgeed, sidoo kale Trump waxa uu masuuliyiinta Ruushka la wadaagay xog sir ah
oo sare taas oo gadaal laga sheegay in Isreal u soo gudbisay Maraykanka, waxa
kale oo Trump u xaqiiyiyay in aanu isagu shaqsiyan baadhisi ku socon.
Dhamaan ficiladani waxa ay la kulmeen cabaarayn
Madaxweyne Trump loo jeediyay. Ku xigeenka Xoghaya saxaafada ee Aqalka cad ayaa
sheegtay May 10, in eriga Comey laga fikirayay ilaa maalintii Trump xilka la
wareegay, waxa sidoo kale Madaxweyne Trump u sheegay Telefishanka NBC in eriga
Comey uu isagu rabay arinta ruushkan uu maanka ku hayay, marka meel la iska
dhigo soo jeedinta xeer ilaalinta guud, Gudoomiyaha iyo xigeenkiisaba, waxa uu
sheegay in FBI-du ay ku dhex dabaalatay qas walina aanay ka soo kaban.
lakiin baadhayaasha saxaafada ee xaqiiqda warka (Fact
checkers) ayaan ganafka ku dhuftay sheegashada Trump, Sidoo kale laba cisho ka
dib ku simaha agaasimka FBI-da Anderw McCabe ayaa gudidda Senate-ka ee
baadhista wadday u sheegay in Comey uu wali haysto taageeradooda.
Dhanka kale loolanka Comey iyo
Trump waxa garab socday baadhis ay bilaabeen Gudidda sirdoonka ee Aqalka sare
ee odayaasha Maraykanku (Senate). Gudiddan oo si gaar ah loo soo xulo waxa
markii ugu horaysa la aasasay sanadkii 1976, waxay korka kala soctaa isla
markaan ay baadhis ku samaysaa hawlaha sirdoonka ee Maraykanka, Gudiddu waxay
baadhistoodu u gudbisaa iyada oo qoraal ah Aqalka Sare ee odayaasha Maraykanka,
kaas oo ka kooban 100 xubnood oo laba xubnood oo kastaa ay matalaan 50-ka
maamul gobaleed (States) ee Waddanka Maraykan, xubin walba oo Aqalka sare ee
Senate-ka ahi waxay matashaa celcelis ahaa in ka badan 3 million oo qof oo
maraykanka ah, sidaas darteed waa xubno aad looga fiirsaday inay Aqalkan ka mid
noqdaan.
Gudiddani waxay ka kooban tahay 15 xubnood, 8 xuboond
waxay ka yimaadaan xisbiga leh aqlabiyada Golaha, 7-na waxay ka yimaadaan
xisbiga kale ee leh kuraasta yar ee Golaha, Shaqo ahaan Gudiddu waxay u
samaysan tahay mid aan tixigalin nidaamka xisbinimada (nonpartisan) si ay uga turjunto
danaha shacabka maraykanka. Hogaanka Gudiddu waxa uu ka yimaadaa xisbiga leh
aqlabiyada Golaha iyo ku xigeenka oo ka yimaada xisbiga kuraasta yar leh, sidoo
kale waxa Guddida ku jira xubin hawl gab ah oo leh darajada ugu saraysa ee
ciidamada qalabka sida iyo xubnaha golaha ee leh khibrada ugu badan ee
xidhiidhka arimaha dibada, iyo nidaamka cadaalada waddanka, dhamaan xubnahaas
iyo Guddoonkoodu waxay hubiyaan habsami u socodka hawlaha Guddida.
Guddidu waxay galaangal u leedahay hawlaha sirdoonka
ee sida gaarka ah loo kaydiyay (Classified Intelligence), waxa kale oo ay awood
u leeyihiin inay xidhiidh la sameeyaan goobaha sirdoonka, nidaamka
koobiyuutarda iyo qaababka kala duwan ee xog helista sirdoonka. Shaqada Gudidda
ama nidaamka ay u shaqayso waxa ka mid ah;
1) In ay dhagaysi samayso (Hearings) – Guddidu waxay
kulantaa week-gii ama labadii week-ba mar si ay xog dhagaysi ah uga hesho
xubnaha sar sare ee Sirdoonka Maraykanka, ama xubnaha hoose ee sirdoonka.
Xubnaha Sirdoonka ee Gudiddu u yeedhdo waxay ka jawaabaan suaalo qaato 1 saac
ilaa 2 saac iyo badh.
Qodobada inta badan la waydiiyo waxa ka mid ah, habka
hawlka sirdoonka, qaabka xog ururinta sirdoonka, qalabka ay adeegsadaan si ay
xogtaas u saxal tiraan iyo qaabka ay u tabiyaan marka ay hubiyaan. Qaabka
waraysiga xubnaha sirdoonka ee gudiddu waxa uu ku yimaadaa qaab xidhan oo aan
dhagaysiga dadweynaha la ogalayn lakiin mararka qaar ayaa si daahfuran oo
telefishanka laga baahiyo ay u qabtaan kulanka suaal waydiinta ee gudidda.
Kulamadaas waxa ka mid ahaa kii James Comey lala yeeshay.
2) Shaqada Gudidda waxa kale oo ka mid ah inay samayso
xeerar (Legislation) xadiddaya hab-dhaqanka xubnaha sirdoonka iyo xeerarka hab
isticmaalka qalabka waxa lagu basaaso.
3) Shaqadda Gudiddan waxa kale oo ka mid ah in ay baadhis
samayo (Investigations and Reviews), Gudiddu waxay awood u leedahay inay
baadhis furto marka ay dhacdo arin la xidhiidha sirdoonka, sida arinta ruushka
ee faro galinta ruushka.
4) Shaqada Gudidda waxa kale oo ka mid ah inay hubiso
xubnaha Madaxweynuhu u soo magacaabo inay noqdaan ama hogaamiyaan sirdoonka,
Gudiddu waxay warbixin (Recommendations) siisaa Golaha Aqalka sare si codka
kalsoonida ah loogu qaado. Waxay dhawaan baadhi doonaa qofka FBI-da hogaamin
doona isla markaan xilka kaal wareegi doona James Comey oo shaqda laga
caydhiyay.
Haddaba sababta inoo keentay in aynu waxa ka ogaano
shaqada Gudiddu ayaa ah doorka ay Gudiddu ku leedahay arinta baadhista FBI-da
ee Madaxweyne Trump uu isku dayay inuu is hortaago taas oo ah haddii ay cadaato
in baadhis Cadaaladeed uu Donald Trump is hortaagay in ay noqnayso in
Madaxweyne Trump uu jabiyay Qodob Dastuuri ah oo ay ka dhalanayso in maamuus ka
xayuubi uu la kulmo.
Haddaba, Gudiddu iyada oo Shaqadeeda Gudanaysa ayay u
yeedhay Madaxii hore FBI-da si suaalo u furan looga waydiiyo shaqada FBI-da,
xidhiidhkii isaga iyo Trump iyo wixii macluumaad ah ee uu ka ogyahay arinta
farogalinta Ruushka ee Doorashada Maraykanka.
Ka hore intii aanuu Comey hor iman Gudidda waxa iyna
Gudiddu u yeedhay Sally Yates oo ahayd ku simihii xeer ilaaliyaha guud ee
Maraykanka ka hore intii aan Trump xilka ka qaadin, Gudiddu waxay Sally Yates
waxa ka waydiisay arinta Mike Flynn iyo xidhiidhkiisa ruushka, waxa kale oo
gudidda u yeedhay Jefferson B. Sessions oo noqday xeer ilaaliyaha guud ka dib
caydhintii Sally Yates.
James Comey intii aanuu hore iman Gudidda waxa uu
saxaafada u dusiyay xog ku saabsan kulankii isaga iyo Madaxweyne Trump ee ka
dhacay Ovel office-ka, Comey waxa uu u sii mariyay xogtaas saxaafada profisoor
culuumta siyaasada ka dhiga Jaamacada Columbia. Comey oo Gudiddu waydiisay
sababta keentay inuu dusiyo macluumaadkan ayaa ku gaabsaday inuu rajo ka qabay
in bandhiga xogtaasi ay sabab karto in cid gaar ah loo magacaabo arinta
ruushka.
May 17-keedii ayuu Xeer ilaaliye xigeenka Maraykanku
Mr. Rod Rosenstein uu u magacaabay Robert S. Mueller inuu noqdo u qaybsanaha
gaarka ah ee arinta ruushka, taas oo noqtay sidii Comey wax u waday. Robert S.
Mueller waa looyer khabiir ah oo magac dheer ku leh waddanka Maraykanka, waa
madaxii hore ee James Comey xilka FBI-da ku wareejiyay, sidoo kale waa
masuulkii ugu wakhtiga dheeraa ee xafiiskaas FBI-da soo mara isaga oo joogay 10
sano oo loo doortay inuu xafiiska FBI-da hogaamiyo iyo 2 sano oo dheeraad ah oo
Madaxweyne Barak Obama uu ugu kordhiyay inuu shaqada FBI-da sii waddo.
Magacaabista Mueller waxa laga soo dhaweeyay guud ahaa
waddanka Maraykanka, gaar ahaa xisbiyada Jamhuuriga iyo dimuquraadiga, waxa loo
arkay inuu ka midho dhalin karo shaqada gaarka ee loo xilsaaray inuu hogaamiyo.
Mueller waxa uu si gaar ah u eegi doonaa arinta ruushka iyo guud ahaa shaqada
FBI-da ee la xidhiidha arinta ruushka iyo doorka Aqalka Cad ee arintan.
Mueller markii uu shaqada bilaabay waxa uu qortay
looyero khibrad dheer lagu tuhmayay kuwaas oo qaarkood lala xidhiidhiyay inay
xisbiga dimuquraadiga taageereen marar badan, taasi waxay ka cadhaysiiyay
Madaxweyne Trump oo bartiisaa Twitter ku cabiray dareenka uu ka qabo shaqada
iyo shaqaalaha Mueller, lakiin muddo yar ka dib waxa soo if baxay in Mr. Robert
S. Mueller uu baadhayo suuragalnimada ah in Madaxweyne Trump uu sameeyay is
hortaag cadaaladeed (Obstructions of Justices) taas oo qaanuunka dastuuriga ah
ee Waddanka Maraykanka ka hor imanayso.
Madaxweyne Trump waxa uu wareer dhanka Twitter-ka ah
ku qaaday ku xigeenka Xeer ilaaliyaha guud kaas oo Trump uu ugu duur xulay in
ninkan (Rosenstein) ee kula taliyay inuu Comey eryo uu isaga (Trump) baadhis ku
hayo, waa dagaal iga dhan ah ayuu Trump ku gabagabeeyay Tweet-kiisa. Madaxweyne
Trump waxa uu tan ka tixraacayay baadhista la sheegay in Mueller uu ku hayo
Trump.
Dhanka kale, James Comey ayaa hortagay Gudidda
sirdoonka ee Aqalka Cad, Comey waxa uu galay laba dhagaysi oo kala ahaa mid
qoraal ah oo 7 bog ka kooban (written Testimony) kaasoo uu kusoo koobay
kulamadii isaga iyo Trump dhex maray, waxay is yidhaahdeen iyo sida uu uga fal
celiyay. James Comey waxa qoraalka ka dib la waydiiyay (Comey Hearings) suaalo
qaatay 2 saac iyo 45 daqiiqo kaas oo 15-ka xubnaha gudidda ahi ay wax kasta oo
la xidhiidha arinta ay waydiiyeen.
Comey waxa si weyn u caawiyay una suura galiyay inuu
si aan hakad lahayn uga gudbo qoraal xafiiseedkii uu ka sameeyay kulamadkii
xasaasigaa ahee isaga iyo Trump dhex maray kuwaas oo si weyn loo tixgaliyay
maadaama uu ahaa masuul xil saarnaa intii uu qoraalka qorayay sidoo kalna aanay
jirin arimo badan oo gadaal ka dhacay sida caydhintii shaqada uu ka caydhiyay
Trump.
La soco qaybta u danbaysa iyo xogaha gaarka ee laga
qaadan karo.
W/Q. Abdiqani Egeh.
Comments
Post a Comment